Zakir Həsənov Rusiya sülhməramlılarının yeni komandanını qəbul edib
Müdafiə naziri general-polkovnik Zakir Həsənov Azərbaycan ərazisində müvəqqəti yerləşdirilən Rusiya sülhməramlılarının yeni komandanını qəbul edib.
Bu barədə Müdafiə Nazirliyi məlumat yayıb. Bildirilib ki, Rusiya Quru Qoşunlarının komandanı ordu generalı Oleq Salyukov Rusiya sülhməramlı kontingentinin yeni komandanı general-mayor Kirill Kulakovu Azərbaycan müdafiə nazirinə təqdim edib.
Görüşdə Zakir Həsənov bildirib ki, Azərbaycanla Rusiya arasında əməkdaşlıq dostluq münasibətləri və qarşılıqlı etimada əsaslanır. Qarabağ iqtisadi rayonunda əməliyyat şəraiti barədə danışan nazir son zamanlarda qeyri-qanuni erməni silahlı dəstələrinin törətdiyi təxribatların sayının artdığını xüsusi vurğulayıb.
Öz növbəsində Rusiya Quru Qoşunlarının komandanı O.Salyukov səmimi qəbula görə təşəkkürünü bildirib, ikitərəfli əlaqələrimizin tarixi köklərə əsaslandığını, ölkələrimizin strateji tərəfdaş olduğunu qeyd edib.