Zaxarova ona "absurd" deyən Simonyanı sərt sözlərlə susdurdu

“Ermənistan nümayəndələri Laçın yolu ilə bağlı son vaxtlar ədəbsizlik səviyyəsində açıqlamalar verirlər, bu isə onlara heç də başucalığı gətirmir”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova mətbuat konfransı zamanı news.ru-nun sualını cavablandırarkən bəyan edib.

O, Ermənistan parlamentinin spikeri Alen Simonyanın Laçın yolu və rusiyalı sülhməramlılar barədə tənqidi bəyanatlarını şərh edib.

“Mənə elə gəlir ki, ədəbsizlik həddində olan bu ritorika Ermənistanın siyasi xadimlərinə heç yaraşmır. Anlayıram, ola bilsin ki, oradakılar hamısı öz rollarını, deyəcəyi sözləri yaxşıca əzbərləyib. Amma əminəm ki, erməni cəmiyyətini təmsil edən şəxslərə bu cür ifadələrdən istifadə etmək başucalığı gətirmir. Belə sözləri isə son vaxtlar biz tez-tez eşidirik”, – M.Zaxarova bildirib.

Rusiya XİN rəsmisi həmçinin vurğulayıb ki, əgər Ermənistan nümayəndələri Rusiya tərəfi ilə ekspert səviyyəsində, “yaxşı siyasi səviyyədə” danışmaq istəyirlərsə, bunun üçün bütün imkanlar mövcuddur.

Qeyd edək ki, spiker M.Zaxarovanın Ermənistanın Azərbaycanın ərazi bütövlüyünü tanıması ilə bağlı açıqlamalarını absurd adlandırıb. A.Simonyan həmçinin bildirib ki, 10 noyabr 2020-ci il tarixli müqavilələrə əsasən, Laçın yolu Rusiya sülhməramlılarının yurisdiksiyasında olmalıdır.