Zaxarova Stoltenberqin Cənubi Qafqaza səfərinə reaksiya bildirdi | NATO-nun məqsədi nədir?
“NATO Baş katibinin Cənubi Qafqaza səfəri növbəti dəfə region ölkələrini Şimali Atlantika Alyansının təsir zonasına çəkmək cəhdidir. Bu cəhdlər natoçular, təşkilatın üzvü olan ölkələr tərəfindən individual və sistemli şəkildə edilib. Belə səviyyədə NATO məmurunun baş tutmuş səfəri təsdiq edir ki, bu istiqamətdə fəallıq dəfələrlə artıb”.
Bunu Rusiya Xarici İşlər Nazirliyinin rəsmi nümayəndəsi Mariya Zaxarova martın 20-si keçirdiyi brifinqdə Yens Stoltenberqin Cənubi Qafqaz ölkələrinə səfərini şərh edərkən bildirib.
“Problem nədir? Problemin məğzi nədir? Məğzi odur ki, Cənubi Qafqazda problemlər azalıb, deyəsən. Bu, Qərbdə kimi qane edə bilər? Kimin xoşuna gələ bilər? Bu ölkələrin əməkdaşlığı, öz aralarında sülh razılaşmasına yaxınlaşmaları Qərbə dinclik vermir. Bu ölkələrin Rusiya ilə münasibətləri Qərbi qane etmir”, – deyə M.Zaxarova bildirib.
XİN sözçüsü vurğulayıb ki, NATO-nun məqsədi Rusiyanın cənub sərhədləri boyu vəziyyəti gərginləşdirmək və Qafqazda rəsmi Moskvaya qarşı ikinci cəbhə açmaqdır. Xatırladaq ki, Yens Stoltenberq martın 17-də Azərbaycana, bir gün sonra Gürcüstana, martın 19-da isə Ermənistana səfər edib.