"Zəfərdən Doğan Qürur" | Qonşu ölkədə tarixi Qələbəmiz qürurla qeyd olundu - Baku TV

Gürcüstanda soydaşlarımızın kompakt yaşadığı Marneuli şəhərində 8 Noyabr – Zəfər Gününə həsr olunmuş “Zəfərdən doğan qürur” adlı təntənəli tədbir keçirilib.

Tədbir Azərbaycan Evinin və Gürcüstan Azərbaycanlılarının İnteqrasiya Mərkəzinin təşkilatçılığı, Azərbaycan Diasporuna Dəstək Fondunun dəstəyi ilə baş tutub.

Tədbirdə çıxış edən Azərbaycan Evinin və Gürcüstan Azərbaycanlılarının İnteqrasiya Mərkəzinin direktoru Məhəbbət İmanov Zəfər Gününün Azərbaycan xalqının tarixindəki müstəsna əhəmiyyətindən danışıb. O, 44 günlük Vətən müharibəsində qazanılan tarixi Qələbənin xalqın milli birliyinin, iradəsinin və vətənpərvərlik ruhunun təntənəsi olduğunu bildirib.

Digər çıxış edənlər də Vətən uğrunda canlarından keçən şəhidlərin fədakarlığının heç vaxt unudulmayacağını vurğulayıblar.

Tədbir çərçivəsində mərkəzin rəsm kursu şagirdlərinin 44 günlük Vətən müharibəsinə və tarixi Zəfərə həsr olunmuş əl işlərindən ibarət sərgi də nümayiş etdirilib. Proqram Gürcüstan və Azərbaycan milli rəqsləri, eləcə də saz ifaları ilə davam edib.