Zelenskinin xüsusi nümayəndəsi: Ermənistanın vəhşi davranışlarına şahid oluruq

Dumanlı hava şəraitində yolu azaraq Naxçıvandan Ermənistan ərazisinə keçən azərbaycanlı əsgərə qarşı ermənilərin qeyri-insani rəftarı xarici ölkələrin ictimaiyyəti tərəfindən qınanılıb.

Ukrayna Prezidenti Volodimir Zelenskinin xüsusi nümayəndəsi, Ali Radanın deputatı Fyodor Venislavski də Baku TV-yə müsahibəsində sözügedən erməni vandallığını pisləyib. O bildirib ki, bu cür cinayət əməlləri törədən və bu barədə əmrlər verənlərə qarşı dünya ictimaiyyətinin yeganə düzgün münasibəti sanksiyaların sərtləşdirilməsidir.

“Əsirlərin döyülməsi sərt şəkildə qınanılmalıdır. Fikrimcə, yalnız beynəlxalq ictimaiyyətin, təşkilatların, ayrı-ayrı ölkələrin çox sərt reaksiyası bu hadisələrin gələcəkdə təkrarlanmasının qarşısını ala bilər”, – deyə deputat qeyd edib.

Qeyd edək ki, azərbaycanlı əsgərə qarşı şiddəti əks etdirən video Ukrayna mətbuatında da geniş yayılıb.