Zəngəzur dəhlizi açılır? - Moskva bu barədə razılığa gəlirsə...

Ermənistan parlamentinin sədri Alen Simonyan İrəvanın Azərbaycanla bütün yolların və kommunikasiyaların açılmasına razı olduğunu bildirib.

A.Simonyanın bu açıqlama ilə Zəngəzur dəhlizinə işarə etdiyi sirr deyil, amma buna baxmayaraq, erməni spiker kommunikasiyaya nəzarəti region ölkələrinin deyil, digər ölkə və təşkilatların həyata keçirməsində maraqlı olduqlarını deyib.

Qeyd etmək yerinə düşər ki, Bakı, İrəvan və Moskva arasında əldə olunmuş üçtərəfli bəyanatın 9-cu bəndinə əsasən, Ermənistanla Azərbaycan arasında bərpa ediləcək nəqliyyat əlaqəsinə nəzarəti Rusiyanın Federal Təhlükəsizlik Xidməti həyata keçirməlidir. Üstəlik, Ermənistanda dəmir yolu nəqliyyatını da məhz Rusiya idarə edir.

Bəs belə olan halda, A.Simonyan “3-cü dövlətin nəzarəti” və ya “digər təşkilat” deyəndə nəyi nəzərdə tutur?