Zəngəzur dəhlizi ilə bağlı heç bir problem yoxdur | Ərdoğan

İnanıram ki, Cənubi Qafqaz arzuladığı sülhə qovuşacaq.

Bunu jurnalistlərə açıqlamasında Türkiyə Prezidenti Rəcəb Tayyib Ərdoğan bildirib.

“Azərbaycan Prezidenti İlham Əliyevlə ikitərəfli görüşdə bu ümidi onda gördüm. Ağ Evdə atılan imzalar Azərbaycan-Ermənistan normallaşma prosesinə, təbii ki, sürət qazandırdı. Azərbaycan və Ermənistan sülh yolunda əhəmiyyətli maneələri aşaraq son mərhələyə qədər gəlib çatdılar”, – deyə Türkiyə lideri qeyd edib.

Bundan əlavə, R.T.Ərdoğan Ermənistanın Baş naziri Nikol Paşinyanla görüşünə də diqqət çəkib:

“Həm İ.Əliyevin, həm də N.Paşinyanın eyni mövqedə olduqlarını gördüm. Onlar bu məsələyə eyni bucaqdan baxırlar. Zəngəzur dəhlizinə gəldikdə isə bu məqamla bağlı hər hansı bir problem və ya fikir ayrılığı yoxdur. Azərbaycan Prezidenti bu məsələdə özünə əmindir. Xüsusilə də ABŞ səfərindəki o görüş və baş tutan danışıqlar bu mövzuda atılacaq addımlarda həlledici rol oynayıb”.