Zərərçəkmiş şəxslərin hüquqi varisləri dindirildi | Baş Prokurorluqdan təcili açıqlama

Erməni silahlı birləşmələri 1992-ci il 28 avqust tarixində gecə saat təxminən 05 radələrində modeli və markası istintaqa dəqiq məlum olmayan avtomat konstruksiyalı odlu silahlarla məhz azərbaycanlı olduğuna görə Ballıqaya kəndində məskunlaşmış 5 ailədən ibarət əhalini məhv etmək üçün rəhmsizlik nümayiş etdiriblər.

Bunu jurnalistlərə açıqlamasında Azərbaycan Respublikası Baş Prokurorluğunun İstintaq İdarəsinin Xüsusilə Mühüm İşlər üzrə müstəntiqi, kiçik ədliyyə müşaviri Tural Məhərrəmov bildirib.

“Onlar çoxsaylı atəşlər açmaqla xüsusi amansızlıqla hücum edib alaçıqları güllələməklə, zərərçəkmiş şəxslərə məxsus əmlakı od vurub yandırmaqla hər kəsi öldürdüklərini güman edib hadisə yerindən gəldikləri istiqamətdə uzaqlaşıb.

Nəticədə 5 ailənin üzvləri olan 24 nəfəri (o cümlədən yetkinlik yaşına çatmayan 7 nəfər və 70 yaşdan yuxarı ahıl yaşlı 1 nəfər) kəskin qanitirmə ilə müşayiət olunan həyat üçün təhlükəli olan sağlamlığa ümumilikdə ağır zərər vurmaya aid müxtəlif bədən xəsarətləri (güllə yaraları) yetirərək hadisə yerində qəsdən öldürüb, 9 nəfəri bədənlərinin müxtəlif nahiyələrindən müxtəlif dərəcəli bədən xəsarətləri alıb, alaçıqlarda gizləndikləri üçün həyatda qalmaqla onları öldürə bilməyiblər”, – o qeyd edib.

Tural Məhərrəmovun sözlərinə görə, cinayət işi üzrə hadisə yerinə baxış keçirilməsi ilə müəyyən edilib ki, Laçın rayonundan o vaxtı məcburi köçkün düşmüş şəxslər Ballıqaya kəndinin dağlıq hissəsində “fin evi” adlanan tikilidə və 4 alaçıqda məskunlaşıblar:

“Onlar həmin gecə təxminən 9 nəfər silahlı erməni hərbçisi tərəfindən ümumi təhlükəli üsulla odlu silahlardan atılmış atəşlər nəticəsində qəsdən öldürülmüş və daha sonra yaşadıqları alaçıqlar od vurulmaqla yandırılıblar.

“Fin evi” adlanan tikili tamamilə yanıb, içərisindən bir qadın və 6 uşaq meyiti, 1-ci alaçıqdan 6 meyit, 2-ci alaçıqdan 4 meyit, 3-cü alaçıqdan 1 yaralı uşaq və 2 meyit, 4-cü alaçıqdan 2 meyit və 2 yaralı uşaq, “Belarus” markalı traktorun yaxınlığından isə 3 meyit aşkar edilib. Hazırda iş üzrə ibtidai istintaq davam etdirilir”.