"Apple" xəbərdarlıq etdi | "iPhone"lar təhlükədədir, yoxsa…?

“Apple” investorlara xəbərdarlıq edib ki, onun bütün məhsulları “iPhone” qədər gəlir gətirməyəcək.

Jurnalistlər rüblük hesabat zamanı investorlara təqdim olunan sənədləri araşdırıblar.

“Biznes riskləri” bölməsində İT nəhənginin liderləri “iPhone”u müstəsna adlandırıblar, çünki o, şirkətə ən çox gəlir gətirən məhsuldur.

Korporasiya bildirib ki, keçmiş və ya gələcək məhsulların heç biri heç vaxt smartfonlar qədər qazanc gətirməyib və bəlkə də gətirməyəcək.

“Yeni məhsullar, xidmətlər və texnologiyalar mövcud təklifləri əvəz edə bilər, lakin bu halda gəlirlər azalacaq”, – deyə “Apple”dan bildirilib.

Analitiklərin fikrincə, “Apple” digər smartfon istehsalçıları ilə şiddətli rəqabətlə üzləşir. Bununla belə, o, hələ də bahalı cihazlarını xeyli sayda istehlakçıya satmağı bacarır.

Dördüncü rüb hesabatında şirkət telefon satışından 46,22 milyard dollar qazanıb. 2023-cü ilin eyni rübündə isə “Apple” “iPhone” satışından 43,8 milyard dollar əldə edib.

“Nikkei” agentliyinin analitikləri “Apple” və “Google”un smartfon istehsalına sərf olunan pulu hesablayıblar. Məlum olub ki, “iPhone”un hazırlanması “Google”un yüksək səviyyəli cihazından 160 dollar baha başa gəlir.