"İnformasiya təhlükəsizliyinin təmin edilməsinə dair təlimat" layihəsi hazırlanır

“Xüsusi Rabitə və İnformasiya Təhlükəsizliyi Dövlət Xidmətinin göstərdiyi metodiki yardım və keçirilən təlimlər nəticəsində İnformasiya Təhlükəsizliyi üzrə Koordinasiya Komissiyasının tövsiyəsinə uyğun olaraq 120-dən çox dövlət orqanı tərəfindən daxili informasiya təhlükəsizliyi təlimatları hazırlanaraq təsdiq edilib”.

Bu barədə sentyabrın 23-də Dövlət Xidmətinin baş idarə rəisi general-mayor Azər Əhədov Dövlət Qurumlarının IT rəhbərlərinin II müşavirəsində bildirib.

O bildirib ki, İnformasiya Təhlükəsizliyi üzrə Koordinasiya Komissiyası dövlət orqanlarında internetdən təhlükəsiz istifadə, informasiya təhlükəsizliyinin gücləndirilməsi məqsədilə “İnformasiya təhlükəsizliyinin təmin edilməsinə dair təlimat” layihəsini hazırlayıb və onların fəaliyyət istiqamətinə uyğun istifadə üçün dövlət orqanlarına göndərilib:

“Burada məqsəd işçilərin bu sahədə məlumatlılığının və biliklərinin artırılmasıdır”.

O həmçinin qeyd edib ki, komissiya tərəfindən “İnformasiya təhlükəsizliyi və kibertəhlükəsizlik strategiyası” da hazırlanıb.