Smartfonunuzun ömrünü bu yolla uzada bilərsiniz

Müasir smartfonları sönmədən daha çox istifadə etmək mümkündür.

Söhbət akkumulyator tutumunun azalmasının qarşısını almaqdan gedir.

Rusiyalı fizika-riyaziyyat elmləri doktoru Aleksey Yurasov bildirib ki, müasir smartfonların akkumulyator tutumu iş zamanı tədricən azalır. O qeyd edib ki, enerjinin doldurulmasını optimallaşdırmaqla bu prosesi ləngitmək olar.

“Litium-ion batareyaları dərin boşalma və həddindən artıq doldurulmanı sevmir. Optimal doldurma diapazonu 20 ilə 80 faiz arasındadır. Batareyanı uzun müddət tam doldurulmuş vəziyyətdə buraxmamaq tövsiyə olunur, çünki bu, onun tutumuna da mənfi təsir göstərə bilər. Keyfiyyətsiz şarj cihazları həddindən artıq qızmağa və akkumulyatorun zədələnməsinə səbəb ola bilər”, – deyə professor bildirib.

A.Yurasov enerji istehlak edən funksiyaları istifadə edilmədikdə söndürməyi də tövsiyə edib:

“Bluetooth”, “Wi-Fi”, GPS və başqa proqramları nümunə göstərmək olar. Ekranın parlaqlığını da azaltmaq lazımdır. Batareyanın işini optimallaşdırmaq üçün əməliyyat sistemlərini yeni saxlamaq vacibdir. Temperatur nəzarəti də önəmlidir – istilik litium-ion batareyalarına mənfi təsir göstərir. Çalışın ki, smartfonu uzun müddət günəş altında və ya qızdırıcı cihazların yanında qoymayın”.

Sonda o, uzun müddət istifadə olunmayacağı təqdirdə smartfonu təxminən 50 faiz enerji ilə saxlamağı tövsiyə edib. Ekspert həmçinin şarj idarəetmə sistemini kalibrləmək üçün batareyanı vaxtaşırı tam doldurmağı məsləhət görüb.