Süni intellektlə bir ilk gerçəkləşdi | Türkiyə Səhiyyə Nazirliyi məlumat yaydı

Türkiyədə ilk dəfə tətbiq olunan “Süni İntellekt Dəstəkli Milli Mammoqrafiya Skrininqi Hesabat Sistemi” bir ildə bir milyondan çox görüntünü analiz edib və süd vəzi xərçənginin erkən mərhələdə müəyyənləşdirilməsində təxminən 90% uğur əldə olunub.

Ölkənin Səhiyyə Nazirliyinin yaydığı açıqlamada qeyd olunur ki, bu sistemin ilkin işlərinə 2016-cı ildə start verilib, 2024-cü ildən isə süni intellekt texnologiyası tətbiq olunmağa başlayıb.

Yeni sistem vasitəsilə təxminən 1 milyon mammoqrafiya görüntüsü süni intellekt alqoritmləri ilə qiymətləndirilib. Şübhəli nəticələr yüksək dəqiqliklə müəyyən olunaraq ilk növbədə araşdırılıb və xəstələr Mərkəzi Həkim Qəbul Sistemi vasitəsilə cərrahiyyə mütəxəssislərinə yönləndirilib.

Qeyd olunub ki, bunun sayəsində xəstəlik erkən mərhələdə aşkarlanaraq daha az cərrahi müdaxilə ilə müalicə olunur, maliyyə və psixoloji yük azalır və xəstələrin yaşam keyfiyyəti yüksəlir.