1 ildən çox həbsdə yatdı, sonra isə.... | Məhkəmə qərarı açıqlandı

Suraxanı rayonu Əmircan qəsəbə sakini İlyas Kazımovun cinayət işi üzrə məhkəmə prosesi başa çatıb.

Bakı Ağır Cinayətlər Məhkəməsinin hakimi Mahirə Kərimovanın sədrliyi ilə keçirilən prosesdə dövlət ittihamçısı İlyas Kazımovun 7 il azadlıqdan məhrum edilməsini istəyib.

Müdafiə çıxışı edən vəkil Adəm Məmmədov isə müvəkkilinin cinayət məsuliyyətinə cəlb olunduğu maddələrlə təqsirinin sübuta yetirilmədiyini vurğulayaraq məhkəmədən onun haqqında bəraət hökmünün verilməsini istəyib.

Məhkəmə heyəti müşavirədən qayıtdıqdan sonra hökm elan edilib. Barəsində həbs qətimkan tədbiri seçilərək 1 il 4 ay həbsdə olan İlyas Kazımov bəraət alaraq elə məhkəmə zalından azadlığa qovuşub.

Qeyd edək ki, İlyas Kazımov Cinayət Məcəlləsinin 234.4.2 və 234.4.3 satış məqsədilə qanunsuz olaraq psixotrop və narkotik maddələrin külli miqdarda dövriyyəsi maddəsi ilə ittiham olunub. O, Daxili İşlər Nazirliyinin Narkotiklərlə Mübarizə Baş İdarəsi əməkdaşları tərəfindən saxlanılaraq istintaqa cəlb olunmuşdu.