Sürücü qəza zamanı vəfat edərsə, dəyən ziyanı kim ödəməlidir? - Baku TV

Tanınmış bədii qiraətçi, Əməkdar müəllim Nadir Hüseynov paytaxtın Nəsimi rayonu, Alı Mustafayev küçəsində avtomobili idarə edərkən qəfil ürəktutması keçirib və idarəetməni itirib. Nəticədə, avtomobil dayanacağa çırpılıb. Nadir Hüseynov hadisə yerində vəfat edib.

Qəza zamanı dayanacaqda olan bir qadın ciddi xəsarət alıb.

“Sükan arxasında olarkən ürəyi dayanıb, gəlib qadını vurdu. Qadının vəziyyəti ağır idi. Kişi ola bilsin ki, əsəbiləşib, infarkt keçirib”, – hadisə şahidi bildirib.

Bəs sürücü qəza zamanı vəfat edərsə, dəymiş ziyan kim tərəfindən ödənilməlidir?

Hüquqşünas Vüsal Cəfərovun sözlərinə görə, qanunvericiliyə əsasən, təqsirkar şəxsin ölümü onun vurduğu zərərin ödənilməsi öhdəliyini aradan qaldırmır:

“İlk növbədə vurulmuş zərər təqsirkar şəxsin əmlakı hesabına ödənilməlidir. Eyni zamanda təqsirkar şəxsin əməli nəticəsində zərər çəkmiş şəxs onun mirasını qəbul etmiş vərəsələrinə qarşı iddia tələbi ilə çıxış edə bilər”.