Arxeoloqlar ölkə ərazisində elə şey tapdı ki... | Detallar açıqlandı

Keşikçidağda 3800 il yaşı olan döyüşçü kurqanı aşkarlanıb.

Bu barədə “Keşikçidağ” Dövlət Tarix-Mədəniyyət Qoruğundan məlumat verilib.

Bildirilib ki, kurqan Ceyrançöl düzənliyində yerləşən və yerli əhali arasında “Yovşanlıdərə” adı ilə tanınan ərazidə elmi-arxeoloji qazıntılar zamanı tapılıb.

Məlumata əsasən, ekspedisiyaya Azərbaycan Milli Elmlər Akademiyasının Arxeologiya və Antropologiya İnstitutunun aparıcı elmi işçisi, tarix üzrə fəlsəfə doktoru, dosent Şamil Nəcəfov rəhbərlik edib.

Onun rəhbərliyi ilə Orta Tunc dövrünə aid diametri 28, hündürlüyü isə 2 metr olan, sərkərdənin dəfn edildiyi kurqandan zəngin artefaktlar aşkarlanıb. Eni 2, uzunluğu 6 və dərinliyi 3 metr olan kurqanda qəbir kamerası uzunu boyunca üç yerə bölünüb: insan skeletinin qoyulduğu yer, gil qabların qoyulduğu otaq və tamamilə boş olan yer.

Kurqanda yarımbükülü vəziyyətdə sərkərdənin əlində tutulmuş dördtilli tunc nizə ucluğu, ayaq biləyi nahiyəsində aşkarlanan tunc bəzək əşyası, pasta muncuqlar və obsidiandan hazırlanmış əmək alətləri, 12 ədəd inkrustasiyalı və zəngin naxışlı saxsı küp aşkarlanıb. Bu küplərin hər biri boğaz və çiyin hissələrində mürəkkəb nöqtəvari döymə və basma naxışlarla bəzədilib, həmin ornamentlərin içərisi isə xüsusi ağ maddə ilə doldurularaq inkrustasiya olunub.

Kurqanın üst örtüyündə 0,5 metr torpaq örtüyündən sonra hər birinin ağırlığı 1 ton, eni 0,60 metr, uzunluğu 2 metr olan 14 ədəd qarşı-qarşıya qoyulmuş qaltan daşları və onların baş hissəsində öküz formasında daş büt aşkarlanıb.