Azərbaycan Metrologiya İnstitutunda mühüm yenilik | Baş direktor görülən işlərdən danışdı

“Azərbaycan Prezidentinin Sərəncamı ilə təsdiq edilmiş 2022-2026-cı illər Azərbaycan Respublikasının sosial-iqtisadi strategiyasının təbliğat planına uyğun olaraq, Azərbaycan Metrologiya İnstitutunda laboratoriya şəbəkəsinin qurulması nəzərdə tutulub”.

Bu sözləri Azərbaycan Metrologiya İnstitutunun baş direktoru Xamis Seyranov jurnalistlərə müsahibəsində söyləyib.

O qeyd edib ki, həmin tədbirlər planına əsasən, 20 yeni və mövcud 7 laboratoriyanın təkmilləşdirilməsi planı icra edilir və hazırda həmin plan üzrə 5 yeni laboratoriyanın açılışı həyata keçirilir:

“Yeni açılan laboratoriyalarda ölçmələr xüsusilə də sənaye üçün kifayət qədər əhəmiyyətlidir. Çünki sənayedə istehsal olunacaq məhsulun keyfiyyətinin ölçülməsi üçün istifadə olunan avadanlıqların yoxlanılması laboratoriyalar vasitəsilə həyata keçiriləcək”.

X.Seyranov onu da əlavə edib ki, laboratoriyaların istifadə istiqamətləri əsasən tibb, istehsal sənayesi, hərbi sənaye, aviasiya və bunlarla əlaqədə olan digər kimya, həmçinin neft sənayesi üçün çox vacibdir.