Azərbaycanlı media nümayəndələri Özbəkistanın "Sevimli TV" telekanalında oldular

Azərbaycanlı media nümayəndələrinin Özbəkistana səfəri davam edir.

Səfərin 2-ci günündə jurnalistlər “Sevimli TV” telekanalında qonaq qismində iştirak edərək kanalın efir siyasəti, proqram kontenti və yaradıcı komandası ilə daha yaxından tanış olublar.

Ziyarət zamanı qonaqlar “Sevimli TV”nin studiya və çəkiliş sahələrinə baxış keçiriblər. Media nümayəndələrinə kanalın texniki imkanları, müasir avadanlıqlarla təchiz edilmiş montaj otaqları, həmçinin canlı efir prosesləri barədə geniş məlumat verilib.

Eyni zamanda hər iki ölkənin televiziya kanalları arasında əməkdaşlıq imkanları və qarşılıqlı təcrübə mübadiləsi məsələləri müzakirə edilib.

Azərbaycan nümayəndə heyəti Özbəkistan Müdafiə Nazirliyində qurumun mətbuat xidmətinin fəaliyyəti ilə də yaxından tanış olub. Tərəflər informasiya təhlükəsizliyi, hərbi sahədə ictimaiyyətlə əlaqələrin təşkili, eləcə də strateji kommunikasiya məsələləri, gələcək əməkdaşlıq imkanları üzrə fikir mübadiləsi aparıblar.

Qonaqlar Nazirliyin nəzdində yaradılan studiyaya baxış keçirib, burada mövcud texniki imkanlar və həyata keçirilən layihələr barədə ətraflı məlumat alıblar.

Sonra “Qələbə parkı” abidə kompleksi və “Şan-şərəf” Muzeyi ziyarət edilib.