Bakıda ilk dəfə Zeytun Festivalı | "Festival çərçivəsində bir sıra tədbirlər keçiriləcək!"

İçərişəhərin Qoşaqala meydanında ilk dəfə Zeytun Festivalı keçirilir.

Burada yerli və beynəlxalq istehsalçılar öz zeytun və zeytun məhsullarını satışa çıxarıblar.

Festivalda iştirak edən vətəndaşlar Baku TV ilə fikirlərini bölüşüblər.

“Burada ilk dəfə zeytun mürəbbəsinin dadına baxdım, çox bəyəndim. Ümumilikdə 50 manata yaxın xərcimiz çıxdı”, – sakinlərdən biri söyləyib.

Sahibkarlardan biri isə belə deyib: “Zeytun yağlarını Türkiyə, Yunanıstan və İspaniyadan idxal edirik. Qiymətlər 5-50 manat arasında dəyişir”.

“İçərişəhər” Dövlət Tarix-Memarlıq Qoruğu İdarəsinin rəsmisi Rəna Mustafayevanın sözlərinə görə, keçirilən festivalın əsas məqsədi zəngin zeytunçuluq ənənələrimizi hamıya tanıtmaq və yerli istehsala dəstək olmaqdır.

“Burada 15-dən çox yerli şirkət təmsil olunur. Festival çərçivəsində bir sıra tədbirlər – sərgilər, uşaqlar üçün ustad dərsləri, konsert proqramı keçiriləcək. Eyni zamanda İçərişəhər ərazisində fəaliyyət göstərən 17-dən çox restoran da bu festivala qoşulub”, – deyə o bildirib.