Bu il Zəngilanda 104 ailənin məskunlaşdırılması nəzərdə tutulur | Növrəs Cəfərov

“Bu il Zəngilan şəhərində 104 ailənin məskunlaşması üçün mənzillərin hazır edilməsi nəzərdə tutulur”.

Bunu Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidmətinin icraçı direktoru Növrəs Cəfərov jurnalistlərə açıqlamasında deyib.

N.Cəfərovun sözlərinə görə, Zəngilan şəhərinin Baş planı İsveçrənin “SA partners” şirkəti tərəfindən hazırlanıb.

Xidmət rəhbəri ilkin mərhələdə Zəngilan şəhərinə köçürüləcək ailələr üçün inşa edilən yaşayış binaları barədə də məlumat verib:

“Zəngilanda tikinti işləri üçün planlaşdırılan ərazi təqribən 333 hektardır. Hazırda ilk yaşayış məhəlləsi üzrə “Townhouse” tipli səkkiz ikimərtəbəli və dörd üçmərtəbəli binanın tikintisinə başlanılıb. Bu ilin sonuna qədər 104 ailənin məskunlaşması üçün mənzillərin hazır edilməsi nəzərdə tutulur”.

O, aparılan inşaat işlərinin birinci mərhələsinin başa çatacağı müddəti də açıqlayıb:

“Bundan əlavə, növbəti yaşayış məhəlləsi üzrə səkkiz binadan ibarət 176 mənzilin, 12 binadan ibarət 138 mənzilin və 87 ədəd “Townhouse” tipli mənzilin layihələndirmə işləri davam etdirilir. 317 ailənin dayanıqlı məskunlaşması üçün layihələndirilən yaşayış kompleksinin inşasının tamamlanması ilin sonuna planlaşdırılır”.