Bulvarda yeni xidmət | Müasir üslubda “keçmişə səyahət” etmək istəyirsinizsə... - Baku TV

Dənizkənarı Milli Parkda ziyarətçilərə fərqli istirahət və gəzinti imkanı təqdim edən yeni layihəyə start verilib.

Bakı şəhərinin fayton ənənələrindən ilhamlanan tarixi görünüşlü nəqliyyat vasitələri artıq müasir, elektrik mühərriki ilə fəaliyyət göstərir. Retro dizaynı müasir texnologiya ilə birləşdirən ekoloji cəhətdən təmiz və səssiz faytonlar paytaxt sakinləri və qonaqları üçün yeni gəzinti təcrübəsi təqdim edir.

Dənizkənarı Bulvar İdarəsinin mətbuat xidmətinin rəhbəri Əfsanə Mehdiyevanın Baku TV-yə verdiyi məlumata görə, faytonlar Bakı bulvarının tarixi marşrutu üzrə hərəkət edəcək:

“Təxminən 35 dəqiqə davam edən gəzinti “Azneft dairəsi” yaxınlığından başlayaraq yenidən həmin nöqtədə başa çatacaq. Səfər zamanı Dənizkənarı Bulvar İdarəsinin peşəkar bələdçiləri ziyarətçilərə bulvarın tarixi, irsi və görməli məkanları barədə məlumat verəcəklər. Marşrut çərçivəsində Qız qalası yaxınlığında qısa fasilə də nəzərdə tutulub. Layihənin maraqlı yeniliklərindən biri isə odur ki, gəzinti iştirakçılarının şəkilləri çəkilərək retro üslubda hazırlanmış qəzet formatında onlara hədiyyə ediləcək”.

Qeyd edək ki, hər bir faytonun tutumu altı nəfərdir və burada dörd böyük, iki uşaq üçün yer nəzərdə tutulub.