Daşkəsəndə yağıntılar evlərə ciddi ziyan vurub

Yağıntılar bölgələrdə fəsadlar törətməyə davam edir.

Daşkəsənin Məhəmməd Əsədov küçəsində yol kənarındakı istinad divarının uçması nəticəsində nəqliyyatın hərəkəti çətinləşib.

Sakinlərin sözlərinə görə, yolun digər tərəfindəki fərdi evə də ciddi zərər dəyib. Burada məskunlaşan 3 ailənin 11 üzvü evi tərk etməli olub.

Qeyd edək ki, aramsız yağıntılar rayonun Bayan, Çanaqçı, Quşçu, Aşağı Daşkəsən, Alaxançallı və Qaraqullar kəndlərində də əkin sahələrinə, körpülərə və yollara ciddi ziyan vurub. Dağlardan iri qaya parçaları və palçıq kütləsi avtomobil yollarına töküldüyündən bəzi yollarda nəqliyyatın hərəkəti dayanıb. Hazırda bərpa işləri davam etdirilir.