Dünyanın danışdığı azərbaycanlı alpinist İsrafil Aşurlı

Azərbaycanlı alpinist İsrafil Aşurlı hər kəsə əsl qəhrəmanlıq nümunəsi göstərib.

Alpinist 8 min metr yüksəklikdə yerləşən, dünyanın doqquzuncu ən hündür zirvəsi sayılan Nanqa Parbatı fəth etmək üçün Pakistana gedib.

İsrafil təxminən 7500 metr hündürlükdə olarkən zirvədə köməyə ehtiyacı olan iki alpinisti görüb. İ.Aşurlı məqsədinə çatmağa az bir zaman qaldığı halda zirvəyə dırmaşmaqdan imtina edərək insanların köməyinə tələsib.

Alpinistlərdən biri – Polşalı Pavel Kapets İsrafil Aşurlının qollarında can verib, digəri isə pakistanlı Asif Phati olub. O, yüksəklikdə gözləri tutulduğundan hərəkət edə bilməyib, köməyinə azərbaycanlı alpinist çatıb.

Məlumat üçün bildirək ki, bədbəxt hadisənin baş verdiyi yüksəklikdə İtaliyadan alpinist qrupu da olub, amma hava şəraitinin pis olması səbəbindən onlar həyatlarını riskə atmaq istəməyərək yüksəkliyə qalxmaqdan imtina ediblər. Həmin vaxt köməyə ehtiyacı olan alpinistləri görsələr də, öz həyatlarını daha üstün tutaraq kömək etməkdən boyun qaçırıblar.

İ.Aşurlı isə çətinliklərə baxmayaraq, görmə qabiliyyətini itirmiş pakistanlı alpinisti özünə bağlayaraq yüksəklikdən endirməyə başlayıb. Azərbcaycanlı alpinist 7 min metrdən çox yüksəklikdən pakistanlı yoldaşı ilə birlikdə aşağı düşə bilib.