Pul qazanmaq istədilər, evlərindən, qızıllarından oldular | “Tost” piramidası çökdü

İki gündür ki, sosial şəbəkələrdə minlərlə zərərçəkənin paylaşımlarının ardı-arası kəsilmir.

Belə ki, bir müddət əvvəl yaranan piramida şəbəkəsi “Tost” çöküb.

“Tost” piramidasının təqdim etdiyi vədlər bəzi insanların varlanmaq xülyasına düşməsinə səbəb olub. Başlanğıcda müəyyən qazanclar verilərək növbəti mərhələlərə keçid olunur. Digər piramidalarda olduğu kimi, “Tost”da da eyni situasiya baş verib. Son mərhələdə pullarını hesablarından çəkmək istəyənlərdən qazanclarının 20 faizinin hesaba yatırılması tələb edilərək yenidən milyonlarla manat mənimsənildikdən sonra bütün hesablara blok qoyulub.

“Bu, bir bəladır. Bu bəlanın qurbanına çevrilmişəm. İtirdiklərim üçün çox təəssüflənirəm. Pulum, qızılım, hər şeyim əlimdən çıxıb. Vətəndaşlarımız özlərini qorusunlar. Hansısa oyunun qurbanına çevrilməsinlər. Sonra hər şey üçün gec olacaq, heç nəyi geri qaytarmaq mümkün deyil”, – zərərçəkən deyib.

Məsələ ilə bağlı Daxili İşlər Nazirliyinin Mətbuat Xidmətindən bildirilib ki, internet resurslarında “Tost” maliyyə piramidası ilə əlaqədar kütləvi dələduzluq halları ilə bağlı məlumatlar yayılıb. DİN-in Kibercinayətkarlıqla Mübarizə Baş İdarəsində həmin maliyyə piramidası ilə bağlı araşdırma aparılır. Nəticəsi barədə məlumat veriləcək.