“Heç özümü bağışlamamışam, sürücünü necə bağışlayım?!” - Motosiklet qəzasında ölən Zəhranın atası

“Arzunun vaxtı” verilişinin budəfəki buraxılışı motosiklet qəzasında həyatını itirən 17 yaşlı Zəhra Mehdiyevanın xatirəsinə həsr olunub.

Verilişdə Zəhranın atası, tanınmış hüquqşünas Fərhad Mehdiyev qızının ölümündən sonra yaşadığı ağır günlərdən, peşmanlıqlarından və övlad-valideyn münasibətlərindən danışıb.

Fərhad Mehdiyev bildirib ki, qızı əvvəlcə ondan xəbərsiz moped, daha sonra isə motosiklet alıb:

“Zəhra əvvəlcə özünə moped almışdı və bunu məndən gizlətmişdi. Mən təxminən iki ay sonra onun mopedi olduğunu öyrəndim. Daha sonra mühərrik həcmi böyük olan motosiklet aldı. Onu öz adına almamışdı, hətta harada saxladığını da bilmirdim. Mən motosiklet sürməsini istəmirdim. Həmişə deyirdim ki, sürət həddini aşma, uzaq məsafələrə getmə”.

O, qızının motosiklet sürməkdən imtina etməyəcəyini sonradan anladığını deyib. Fərhad Mehdiyevin sözlərinə görə, qadağa qoymaq əvəzinə onun yanında olmalı və hərəkətlərinə daha ciddi nəzarət etməli idi:

“Əvvəl düşünürdüm ki, kaş ona bu qədər azadlıq verməzdim. İndi isə azadlıq verdiyimə görə deyil, həmin azadlığa kifayət qədər nəzarət etmədiyimə görə peşmanam. Mən onu motosiklet sürməkdən uzaqlaşdıra bilməyəcəkdim. Çünki Zəhra motosiklet sürməyi həddindən artıq çox sevirdi. Gərək onun yanında olaydım, təhlükələri düzgün izah edəydim”.