“Keçəndə başımıza tökülür” | Yuxarı mərtəbədən gələn “sürpriz”lərdən necə qorunaq? - Baku TV

Çoxmərtəbəli binalarda qonşular arasında yaranan narazılıqların səbəbləri bəzən olduqca adi görünür. Kondisionerdən axan su, eyvanda çırpılan xalça, qurudulan paltarlar, hətta yuxarı mərtəbədən aşağı düşən məişət əşyaları sakinlər üçün ciddi narahatlığa çevrilə bilər.

Sakinlər bildirirlər ki, xüsusilə kondisionerlərdən axan suyun aşağı mərtəbələrdə yaşayan və ya həyətdən keçən insanların üzərinə tökülməsi narahatlığa səbəb olur.

Vətəndaşlar hesab edirlər ki, kondisionerdən axan suyun xüsusi borulardan istifadə edilməklə kanalizasiya sisteminə yönəldilməsi daha məqsədəuyğundur.

Bununla yanaşı, eyvanlardan paltar və digər əşyaların asılması da binanın ümumi görünüşünə və qonşuların rahatlığına təsir edə bilər.

Ekspertlər bildirirlər ki, mənzil sahibinin öz mülkiyyətindən istifadə hüququ olsa da, bu hüquq digər sakinlərin rahatlığını və binanın ümumi estetik görünüşünü pozmamalıdır.

“Bu məsələdə birinci növbədə maarifləndirmə aparılmalıdır. İkinci mərhələdə isə cəza tədbirləri görməyə ehtiyac var. Əziyyət çəkən qonşu bir-bir binadakı digər qonşuların qapısına gedib, deməməlidir ki, siz məni narahat edirsiniz. Mütləq bu məsələyə nəzarət edən şəxs olmalıdır”, – deyə kulturoloq Minaxanım Əsədova vurğulayıb.