Sərnişinlərə şad xəbər | Bu stansiyalara giriş nə qədər müddət ödənişsiz olacaq? - Baku TV

“Sentyabrın 23-dən “Xocəsən” və “Avtovağzal” stansiyalarına sərnişinlərin girişi ödənişsiz olacaq”.

Bu sözləri “Bakı Metropoliteni” Qapalı Səhmdar Cəmiyyətinin mətbuat xidmətinin rəhbəri Bəxtiyar Məmmədov deyib.

“Bildiyiniz kimi, paytaxtın mərkəzinə doğru ən çox sərnişin axını Sumqayıt-Xırdalan istiqamətindəndir. Eyni zamanda Bakı-Şamaxı yolu üzərində olan kənd və qəsəbələri də buraya əlavə edə bilərik. Kifayət qədər böyük bir ərazini əhatə etdiyi üçün səhər saatlarında “20 Yanvar” stansiyasının ətrafı və “Şamaxinka” kimi tanınan ərazilərdə sıxlıq yaranır. Sözügedən problemin aradan qaldırılması istiqamətində atılan bu addım öz müsbət təsirini göstərməlidir. Onu da xüsusi qeyd edim ki, bu vaxta qədər mərkəzləşdirilmiş nəqliyyat monitorinqləri aparılıb. Nəticələrə əsasən, bu addımın atılması zəruri görünür”, – deyə o bildirib.