İl ərzində heç bir iş görülməyib | İncəsənət Gimnaziyasında oxuyanların valideynləri şikayətləndi

İncəsənət Gimnaziyasında oxuyan şagirdlərin valideynləri təhsil ocağının bir ildən çoxdur ki, təmirə bağlanmasından şikayətçidirlər.

Onlar övladlarının yaradıcı dərslərdən geri qaldıqlarını bildirirlər.

“Bir il ərzində heç bir iş görülməyib. Ölkədə bir İncəsənət Gimnaziyası var. Bu məktəbə qarşı belə laqeyd münasibət göstərilməməlidir”, – valideynlərdən biri söyləyib.

“Bizim bu məktəbi seçmə səbəblərimizdən biri də incəsənət sahəsinin olması idi. Uşaqlarımız rəqsi onlayn necə öyrənəcəklər? Onlar indi təhsil aldıqları məktəbdə dərsdən tamamilə soyuyublar. Biz ya məktəbin bərpa olunmasını, ya da bu profildə başqa məktəbin səhər növbəsində istifadəyə verilməsini istəyirik”, – deyə başqa bir valideyn bildirib.

Məsələ ilə bağlı Məktəbəqədər və Ümumi Təhsil üzrə Dövlət Agentliyindən bildirilib ki, Azərbaycan Milli Konservatoriyasının tərkibində fəaliyyət göstərən İncəsənət Gimnaziyası binasının bərpa gücləndirilməsi çərçivəsində layihə işlərinin təkmilləşdirilməsi mərhələsi artıq başa çatıb. Hazırlanmış müvafiq sənədlər aidiyyəti qurumlara təqdim olunub. Yenilənmiş layihə üzrə məktəb binasının əsaslı təmir-bərpa işləri müvafiq qaydada davam edir.