İranlı kişini aldadıb 4 avtomobilini əlindən aldılar | "Deyir ki, başına oyun açacağam" - Baku TV

Altı il əvvəl İrandan Azərbaycana gələn şəxs iş qurmaq məqsədilə kreditlə yük avtomobili alıb. Lakin bir müddət sonra avtomobili onun əlindən alıblar və ona oğurluq ittihamı irəli sürülüb.

Nəticədə, həmin avtomobil başqa qiymətə ona satılıb, amma sonradan yenə əlindən alınaraq borcun vaxtında ödənməməsi səbəbindən geri götürülüb. Beləliklə, bu gün həmin şəxs həm maşınını, həm də pulunu itirib.

Şikayətçi Əli Əlibagei məsələyə dair bunları bildirib:

“2020-ci ildə İrandan gəldim və iş qurmaq üçün iki yük maşını aldım. Birinci maşını öz adıma almışdım, qiyməti 38 min manat idi. İkinci maşını alandan sonra Arzu Nurayeva gəldi, maşınımın oğurluq olduğunu iddia edib onu götürdü. Bir neçə gün sonra gəldi və dedi ki, maşını mənə satmaq istəyir. “Mən bank işçisiyəm, narahat olma, borcunu ödəyərsən” dedi. 13 min manata razılaşdıq və hər ay 1300 manat ödəyəcəyimi bildirdi.

Mənim üç maşınım var idi. Arzu xanım maşınları öz adına keçirməyimi tələb etdi. Altı ay sonra kreditin bitməyinə 1000 manat qalırdı. Türkiyəyə getdim, qayıdanda isə dedilər ki, maşını Arzu xanım aparıb. Zəng etdim ona, dedi ki, borcum gecikir və maşını satdım. Mən “belə olmaz” deyəndə o maşınları satıb pulumu verməyəcəyini bildirdi. Nəticədə, həm birinci maşını, həm də digər üç maşını itirdim. Arzu xanım hər zaman mənə deyir ki, bax gör, nə oyunlar açacağam sənin başına”. Bu məsələyə görə düz 110 min manata yaxın pulum getdi”.