İstanbul su altında | Bakı eyni təhlükə ilə üzləşə bilərmi? - Baku TV

Ekoloq Qorxmaz İbrahimli Bakıda güclü yağışlar və sel təhlükəsi ilə bağlı xəbərdarlıq edib.

O, Baku TV-yə açıqlamasında iqlim dəyişiklikləri fonunda gözlənilməz təbiət hadisələrinin baş verə biləcəyini və şəhərin bu cür vəziyyətlərə hazır olmasının vacibliyini bildirib.

Ekoloqun sözlərinə görə, müəyyən ərazilərdə uzun illər yağışın yağmaması və ya sel hadisələrinin baş verməməsi həmin ərazilərdə tikinti aparılarkən risklərin nəzərə alınmaması üçün əsas olmamalıdır.

“Bir yerdə 5-10 il yağış yağmırsa, sel gəlmirsə, bu, orada tikinti aparmağın təhlükəsiz olduğu anlamına gəlmir. Nəzərə almaq lazımdır ki, 50 il sonra burada hansısa hadisə baş verə bilər”, – deyə Qorxmaz İbrahimli vurğulayıb.

O qeyd edib ki, son iki ildə Bakıda müşahidə olunan leysan yağışları və fırtınalar şəhərin infrastrukturunda ciddi problemlərin olduğunu üzə çıxarıb.

Ekoloq hesab edir ki, Bakıda mümkün sel və güclü yağıntı risklərinə qarşı qabaqlayıcı tədbirlər görülməlidir.

“Ən azı Bakı şəhərini idarə edənlər bu barədə düşünməli, tədbirlər görməlidirlər. Hər an hər şey ola bilər. Bu gün iqlim dəyişikliklərindən danışırıq. Bütün bunların fonunda gözləmədiyimiz bir çox hadisələr baş verə bilər”, – deyə Qorxmaz İbrahimli bildirib.

O əlavə edib ki, Bakıda güclü yağışların nə zaman və hansı miqyasda baş verəcəyini əvvəlcədən dəqiq proqnozlaşdırmaq mümkün olmasa da, təhlükələrə hazır olmaq vacibdir.

“Heç kim zəmanət verə bilməz ki, belə hadisələr baş verəcək, ya yox. Bəs baş versə, nə olacaq? Biz buna hazır deyilik. İstanbulda da vəziyyət göstərir ki, şəhər infrastrukturu, o cümlədən kanalizasiya sistemləri və süngər asfalt kimi həllər bu cür yağıntıların yaratdığı problemlərin qarşısını almaqda mühüm rol oynayır”, – deyə ekoloq fikrini yekunlaşdırıb.