Min bir dərdin dərmanı kinkan

Cənub bölgəsində kinkan sitrus bitkisinin yığımı başa çatmaq üzrədir. Ötən il bir bağdan 1 tona kimi məhsul yığılırdısa, bu il yığım yarıya qədər düşüb.

Kinkan sitrus bitkisindən 15-dən çox xəstəliyin müalicəsində istifadə olunur. Bu bitki cənub bölgəsində daha çox Astara və Lənkəranda becərilir.

Kütləvi yetişdirilməsinə ötən əsrin 70-80-ci illərindən başlanılıb. Xüsusi qulluq tələb etməyən kinkan digər sitrus meyvələri ilə müqayisədə daha tez, yəni əkildikdən 2 il sonra bar verir. Ağacları yaşa dolduqca daha da məhsuldar olur. Hər bir ağacdan orta hesabla 10-15 kiloqram məhsul əldə etmək mümkündür.

Ötən il kinkan məhsulunu bağlardan kilosunu 1 manat 60 qəpik, 1 manat 80 qəpiyə alırdılarsa, bu il 2 manat 50 qəpik, 3 manata satılır. Lakin məhsul az olduğu üçün fermerlər yaxşı gəlir əldə edə bilmədiklərini deyirlər.

Dadına görə portağalı xatırladan və C vitamini ilə zəngin olan kinkandan şəkərli diabet xəstələri və yüksək təzyiqdən əziyyət çəkən insanlar daha çox istifadə edir. Şərqdə kinkanın faydaları çox yüksək qiymətləndirilir. “Dahilərin qidası” adlandırılan bu meyvə beyinin fəaliyyətinə, sinir sisteminə çox müsbət təsir edir. Kinkan qrip və soyuqdəymə zamanı da faydalıdır.