Müdafiə Nazirliyinin rəhbərliyi müalicə olunan hərbi qulluqçuları ziyarət etdi

Martın 20-də Müdafiə Nazirliyinin rəhbər heyəti Müdafiə Nazirliyinin Baş Klinik Hospitalında müalicə olunan hərbi qulluqçuları ziyarət edib.

Nazirlikdən bildirilib ki, rəhbər heyət hospitalda müalicə olunan hərbi qulluqçulara baş çəkib, onların səhhəti ilə maraqlanaraq bayram hədiyyələri təqdim edib. Ən qısa müddətdə sağlamlıqlarını bərpa edərək xidmət yerlərinə qayıtmalarını arzulayıb.

General-polkovnik Z.Həsənov Prezident, Silahlı Qüvvələrin Ali Baş Komandanı İlham Əliyevin Novruz bayramı münasibətilə təbriklərini çatdırıb.

Müdafiə nazirinə məruzə olunub ki, hospitalda hərbçilərimizin müayinə və müalicəsi üçün tibbi personal yüksək peşəkarlıqla fəaliyyət göstərir.

Tibb işçiləri ilə görüşən nazir onları da bayram münasibətilə təbrik edib, hərbi qulluqçulara daha keyfiyyətli xidmət göstərilməsi ilə bağlı müvafiq tapşırıqlar verib.