Hövsandakı xeyir-şər evi qalmaqalının pərdəarxası | Rəsmi açıqlama - Baku TV

Baku TV-nin qaynar xəttinə daxil olan şikayət əsasında vətəndaşlar bildiriblər ki, Suraxanı rayonu, Hövsan qəsəbəsində yerləşən ərazi 2011-ci ildə zibillik olub. Ərazi icra hakimiyyəti tərəfindən təmizlənib və sakinlərə burada xeyir-şər evinin tikiləcəyi bildirilib.

Lakin sonradan bu istiqamətdə iş görülmədiyi üçün sakinlər öz aralarında pul toplayaraq ərazidə xeyir-şər evi tikməyə başlayıblar. Ancaq tikinti aidiyyəti qurumlar tərəfindən dayandırılıb və söküntü işləri aparılıb.

Sakinlərin sözlərinə görə, hazırda ərazidə xeyir-şər evi yoxdur və onlar mərasimlərini keçirmək üçün uyğun yer tapa bilmirlər.

“Qurumlardan bizə heç bir xəbərdarlıq olunmamışdı. Xeyir-şər evi kimi tikirdik. Əmlak Məsələləri Dövlət Xidmətinin əməkdaşları gəlib buranı sökdülər və bildirdilər ki, tikinti qanunsuzdur. Bizə icazə verilməsi, vaxt və möhlət tanınması ilə bağlı xahiş etdik. Dedik ki, müəyyən vaxt çərçivəsində aidiyyəti qurumlara müraciət edək, sənədlərimizi qaydasına salaq. Lakin bizə vaxt verilmədi və tikili söküldü”, – şikayətçi Bəxtiyar Kazımov deyib.

Məsələ ilə bağlı Suraxanı Rayon İcra Hakimiyyətindən bildirilib ki, Hövsan qəsəbəsində aparılan özbaşına tikinti işlərinin qarşısı aidiyyəti qurumlarla birgə keçirilən tədbir çərçivəsində mövcud qanunvericiliyin tələblərinə uyğun olaraq alınıb.

Qeyd olunub ki, Şəhərsalma və Tikinti Məcəlləsinin 75-ci maddəsinə əsasən, tikintisinə icazə tələb olunan obyektlərin inşası üçün sifarişçi müvafiq sənədlərlə birlikdə aidiyyəti üzrə müraciət etməlidir.