Oğuz sakinlərinin yol problemi nə vaxt həll olunacaq? - Baku TV

Oğuz rayonunun Ərmənət kəndinə aparan təxminən 3 kilometrlik yol uzun illərdir asfalt üzünə həsrət qalıb. Bu yol həm Xalxal kəndinə, həm də Qaraməryəm–İsmayıllı–Şəki magistralına yeganə çıxışdır. Yolun bərbad vəziyyəti səbəbindən nə taksilər, nə də qonaqlar kəndə rahat şəkildə gələ bilmir. Sakinlər bildirirlər ki, bu şərait kənddə insanların yaşamasını çətinləşdirir, nəticədə bir çox ailələr köçmək məcburiyyətində qalır.

Azərbaycan Avtomobil Yolları Dövlət Agentliyi açıqlamasında yolun ümumi uzunluğunun 2,8 kilometr olduğunu, 2 kilometrlik hissənin Agentliyin, 800 metrlik hissənin isə bələdiyyənin balansında olduğunu qeyd edib. Qurum yolun yenidən qurulması üçün təkliflər hazırlayıb və aidiyyəti üzrə təqdim edib. Hazırda maliyyə vəsaitinin ayrılması gözlənilir. Vəsait təsdiqləndikdən sonra yolun yenidənqurma işlərinə başlanacaq. Bu layihənin həyata keçirilməsi kənd sakinlərinin sosial həyatını asanlaşdıracaq, kəndin inkişafına və turizm potensialının artmasına şərait yaradacaq.