On bir ayın sultanı Ramazan başladı

Bu gündən Ramazan ayı başlayıb.

Qafqaz Müsəlmanları İdarəsinin Qazılar Şurasının Ramazan ayının başlaması ilə bağlı yaydığı fətvada bu il Ramazan ayının 1-nin miladi təqvimlə fevral ayının 19-na təsadüf etdiyi qeyd olunub.

Fətvada bildirilib ki, Ramazan bayramının tarixi Şəvval ayının hilalının görünməsindən asılı olaraq, böyük ehtimalla martın 20-nə təsadüf edəcək.

Ramazan ayının ilk gününün imsak vaxtı səhər saat 06:04-də, iftar vaxtı isə saat 18:20-də olacaq.

Fətvada bildirilib ki, Ramazan təqvimi Azərbaycan xalqının çoxəsrlik tarixində özəl yeri və milli önəmi olan Novruzla üst-üstə düşür. Tövsiyə olunub ki, çərşənbə axşamlarında açılan Novruz süfrələri iftar saatlarına uyğunlaşdırılsın. Mərhəmət və şəfqət ayı olan müqəddəs Ramazan ayı ərzində iftar süfrələri açmaq, yardım və xeyriyyəçilik etmək, ehtiyacı olanlara, kimsəsiz insanlara, uşaq evlərinə, ahıl və qocalara imkan daxilində köməklik göstərmək Allahın nəzərində bəyənilən əməllərdəndir. Oruc ibadətinin mühüm əməllərindən biri olan fitrə zəkatının vaxtı Ramazan ayının son günüdür.

Hər il olduğu kimi, bu il də Qafqaz Müsəlmanları İdarəsi Ramazan ayının gündəlik duaları, imsak-iftar vaxtlarını əks etdirən xüsusi təqvim tərtib edib. İlk Qədr gecəsi martın 8-i, digərləri isə martın 10-u, 12-si və 16-sı olacaq. Nazirlər Kabinetinin müvafiq qərarına əsasən, martın 20-si və 21-i Azərbaycanda Ramazan bayramı kimi qeyd olunacaq.