Orqanlarını satmaq istəyənlər bunları bilsin | Sosial şəbəkədə orqan bazarı

Maddi sıxıntılar, çarəsizlik bəzən insanları orqanlarını satmaq qərarı verməyə vadar edir. Amma belə bir addım atmaq donor üçün qanusuz, eləcə də tibbi baxımdan təhlükəlidir.

Azərbaycanda daxili orqanların alqı-satqısı qadağan olunsa da, qeyri-rəsmi mənbələr ölkəmizdə gizli şəkildə belə bazarlıqların həyata keçirildiyini istisna etmir.

Həkim Abbas Bağırovun sözlərinə görə, insanın hər hansı orqanı çıxarılanda bədənin müəyyən resursları azalmış olur:

“Cüt orqanlardan biri başqasına verildikdə digəri onun funksiyasını da öz üzərinə götürür. Bu isə orqanizmin normal fəaliyyəti üçün qənaətbəxş deyil. Qaraciyər köçürmələri zamanı isə xəstə uzun müddət xüsusi rejimə əməl etməli olur”.

Bəs görəsən, qanunsuz orqan satışı hüquqi baxımdan necə tənzimlənir?

Cinayət Məcəlləsinin 137.1-ci maddəsinə əsasən, insan orqanları və toxumalarının, həmçinin donor orqanların alqı-satqısı cinayət məsuliyyətinə səbəb olur.

Həmin maddənin sanksiyasında 6 min manatdan 9 min manata qədər cərimə, 2 ilədək müddətdə islah işləri və ya 3 ilə qədər müddətdə müəyyən vəzifə tutma, yaxud fəaliyyətlə məşğul olma hüququndan məhrum edilməklə və ya edilməməklə 3 ilə qədər müddətdə azadlıqdan məhrum etmə cəzası nəzərdə tutulub.