Yoxsulluq pik həddə: böyrək satışı kəskin artdı

Son aylar İranın bir çox əyalətində yoxsulluq səbəbindən böyrəklərini satan vətəndaşların sayı kəskin artıb.

Bunu Kirmanşah Böyrək Xəstəliklərinə Dəstək Dərnəyinin sədri Hüseyn Beygləri deyib. O, Kirmanşahda bir böyrəyin 200-250 milyon tümənə, yəni təxminən 4-5 min dollara satıldığını, böyük şəhərlərdə isə qiymətin daha yüksək olduğunu bildirib.

H.Beyglərinin sözlərinə görə, böyrəyini baha qiymətə satmaq istəyən 18-40 yaş arası İran vətəndaşları isə İraq, BƏƏ və Türkiyəyə üz tutur, 7-15 min dollar qarşılığında satırlar.

“Azad İran” “Telegram” kanalında yayımlanan bir başqa görüntüdə də 33 yaşlı gəncin öz bədənini satışa çıxardığı görünür.

“Bədənimin bütün orqanları satılır, tam sağlam, analiz edilmiş A+ qan qrupu, 33 yaş. Yalnız real alıcı əlaqə saxlasın, həyat yoldaşım və övladlarımdan utanıram. Əgər ac övladınız varsa, məni başa düşərsiniz”, – deyə yazılı plakatla gəzən şəhər sakini bu vəziyyətin səbəbkarını lənətləyir.

Məsələ ictimailəşəndən sonra İran rəsmiləri isə bunu bir sıra vətəndaşların asan yolla qazanc istəyi kimi qələmə verib, onların avtomobil və lüks əşyalar almaq məqsədilə belə bir yola əl atdıqlarını iddia edib.