“Öz günahıma görə küçələrdəyəm” | “Qan qaytarırdım, 2 aydır yemək yemirdim” - ARZUNUN VAXTI

“Arzunun vaxtı” verilişinin budəfəki buraxılışı kimsəsiz Vüqar Rzayevin həyat hekayəsinə həsr olunub.

Uzun müddətdir normal yaşayış yeri olmayan 50 yaşlı kişi hazırda Bakıda plana düşmüş, yararsız vəziyyətdə olan tikililərdən birində ağır şəraitdə yaşayır.

O bildirib ki, vaxtilə “Sovetski” ərazisində yaşayıb, lakin ailə evi illər əvvəl satılıb. Daha sonra fəhləlik edərək dolanmağa başlayıb:

“Atam evi dəyər-dəyməzə satdı. Qardaşım xəstə idi, evin pulu onun müalicəsinə xərcləndi. Sonra fəhlə işləməyə başladım. Heç vaxt sabahı fikirləşmirdim, bu günlə yaşayırdım. Oxumağa da həvəsim olmayıb. Kirayədə yaşamağa pulum olmadığı üçün küçələrə düşməyə məcbur oldum”.

Vüqar heç vaxt ailə qurmadığını söyləyib:

“Evi olmayana qız vermirdilər. Mənim də ailə evim 25 yaşıma qədər var idi, onda da evlənmək istəmirdim, düşünürdüm ki, 30-35 yaşımda ailə quraram. Beləcə illər keçdi. Həmişə özüm üçün yaşamışam”.

O, son aylarda səhhətində ciddi problemlərin yarandığını da vurğulayıb. Mədə xəstəliyindən əziyyət çəkdiyini deyən Vüqar bu səbəbdən hərəkət etməkdə problem yaşadığını bildirib.

Şəxsiyyət vəsiqəsinin də olmadığını qeyd edən kişi bunun iş tapmasına maneə yaratdığını vurğulayıb. Onun sözlərinə görə, hazırda ən böyük ehtiyacı sığınacaqla təmin olunmaq və şəxsiyyət vəsiqəsinin bərpa edilməsidir.