Məzunlar attestatı necə alacaq? - Yeni tədris ili barədə məlumatlar - Baku TV

Məktəbəqədər və Ümumi Təhsil üzrə Dövlət Agentliyinin (MÜTDA) direktor müavini Nərminə Hüseynova təhsil sistemində tətbiq olunan son yeniliklər və qarşıdakı hədəflərlə bağlı Baku TV-yə açıqlama verib.

MÜTDA rəsmisi bildirib ki, yeniliklərdən biri “Rəqəmsal məktəb” platformasının tətbiqidir. Bu platforma vasitəsilə məktəblərdə tədris prosesində baş verən bütün fəaliyyətlər elektronlaşdırılıb və şəffaflıq təmin olunub. Layihənin uğurlu nəticələri nəzərə alınaraq növbəti tədris ilindən etibarən bu platformanın respublikanın bir sıra digər regionlarında da tətbiqinə başlanılacaq.

Qeyd olunub ki, bu il tətbiq olunacaq ən mühüm yeniliklərdən biri isə attestatların elektronlaşdırılmasıdır:

“Elektron Hökumət İnformasiya Sistemi vasitəsilə hər bir şagird və ya valideyn elektron attestatı istənilən an rahat şəkildə izləyə, yükləyə, rəsmi qurumlara göndərə və ya ehtiyac yarandıqda çap edə biləcək”.