“Park Yasamal”dakı vəziyyət vətəndaşın narazılığına səbəb oldu

Sosial şəbəkələrdə “Park Yasamal” yaşayış kompleksi ilə bağlı yayılan videogörüntülərdə ərazidə natəmizlik və tikinti problemlərinin mövcud olduğu iddia olunub.

Baku TV-nin ərazidə apardığı müşahidələr isə göstərir ki, hazırda kompleksin həyətində sözügedən problem müşahidə edilmir.

Sakinlərin sözlərinə görə, həyət hər gün təmizlənir, park ərazisində kifayət qədər kiçik tullantı qutuları, hər blokun qarşısında isə məişət tullantıları üçün ayrıca zibil qutuları yerləşdirilib.

Videoda qeyd edilən avtodayancaq məsələsinə gəlincə, aparılan müşahidələr nəticəsində burada da hər hansı problemin olmadığı məlum olub.

Təhlükəsizlik baxımından kompleksdə zəruri tədbirlər görülüb. Belə ki, binalara giriş-çıxış üz tanıma sistemli domofonlarla təmin olunub, girişdə mühafizə xidməti fəaliyyət göstərir.

Sakinlər bildirirlər ki, videogörüntülərdə göstərilən hallar binanın təhvilindən əvvəlki dövrə ‒ təmir işlərinin aparıldığı vaxta aiddir. Həmin vaxt mənzilə baxış zamanı bu cür hallar müşahidə olunub. Lakin hazırda bütün problemlər aradan qaldırılıb.