Kür çayının Zərdab rayonu ərazisindən keçən hissəsində suyun səviyyəsi artıb

Kür çayının Zərdab rayonu ərazisindən keçən hissəsində suyun səviyyəsində kəskin artım qeydə alınıb. Mingəçevir su anbarında suyun tənzimlənməsi məqsədilə çaya buraxılan suyun həcminin saniyədə 700 kubmetrə qədər artırılması Zərdabda çayın səviyyəsinin 8,77 metrə yüksəlməsinə səbəb olub. Mövcud vəziyyətlə əlaqədar olaraq çaykənarı subasar ərazilərdə yerləşən əkin sahələri, xüsusilə yonca zəmiləri su altında qalıb. Texniki qurğuların təhlükəsizliyini təmin etmək üçün sahildəki bəzi nasos stansiyalarının fəaliyyəti müvəqqəti dayandırılıb və onlar riskli zonalardan uzaqlaşdırılıb. Rayon Fövqəladə Hallar Komissiyası və Azərbaycan Dövlət Su Ehtiyatları Agentliyinin əməkdaşları əraziyə cəlb olunaraq 24 saatlıq növbətçilik rejiminə keçiblər. Hazırda yaşayış məntəqələri və əsas mühafizə bəndləri üçün ciddi təhlükə yoxdur, vəziyyət operativ şəkildə nəzarətdə saxlanılır.