Qarabağda qəfəsdə saxlanılan şir Cənubi Afrikaya göndərilib

Ermənilərin uzun illər qəfəsdə baxımsız vəziyyətdə saxladığı “Ruben” adlı şir Cənubi Afrikaya göndərilib.

Bu barədə məlumatı “Daily Mail” yayıb. Bildirilir ki, proses Böyük Britaniyada yerləşən “Animal Defenders International” təşkilatının köməkliyi ilə həyata keçirilib.

“Ruben” adlı yırtıcı Cənubi Afrikada şir və pələnglər üçün nəzərdə tutulan xüsusi qoruqda yaşayacaq. “Daily Mail”in yazdığına görə, sözügedən 15 yaşlı şir vaxtilə ermənilərin işğalı altında olan Azərbaycanın Ağdərə rayonunda yerləşən zooparkda dünyaya gəlib.

Zoopark erməni biznesmenlərdən birinə məxsus olub. O, dünyasını dəyişdikdən sonra bütün heyvanlar xilas edilsə də, həmin şir təqribən 6 il ərzində baxımsız və tək vəziyyətdə qalıb. Ruben bir müddət əvvəl xilas edilərək İrəvan yaxınlığındakı zooparka köçürülmüşdü.