Azərbaycanda avtonom nəqliyyat vasitələri necə fəaliyyət göstərəcək? - Baku TV

Azərbaycanda “Rəqəmsal inkişafın sürətləndirilməsinə dair 2026–2028-ci illəri əhatə edən Fəaliyyət Planı”nda avtonom nəqliyyat vasitələri ilə bağlı normativ-hüquqi, texnoloji və institusional bazanın formalaşdırılması nəzərdə tutulub.

Bunu rəqəmsal inkişaf və nəqliyyat nazirinin müavini Rəhman Hümmətov bildirib.

Onun sözlərinə görə, aviasiya, dəniz, avtomobil və dəmir yolu nəqliyyatını əhatə edən qanuna dəyişikliklərin edilməsi məqsədilə qanunvericilik layihəsi hazırlanıb.

“Edilən dəyişikliklərə əsasən, avtonom nəqliyyat vasitəsi, onun operatoru və məsafədən idarə edilməsi kimi fundamental anlayışlar qanunvericilikdə öz əksini tapıb. Eyni zamanda operatorların şəhadətnamə alması, onların hüquq və vəzifələri, eləcə də məsuliyyət dairəsi ilə bağlı müddəalar da layihəyə daxil edilib.

Bu dəyişikliklər normativ-hüquqi bazanın formalaşdırılmasına imkan yaradır və növbəti mərhələdə avtonom nəqliyyat vasitələrinin praktik tətbiqi üçün hüquqi zəmin yaradır.

Bununla yanaşı, səlahiyyətli qurum tərəfindən avtonom nəqliyyat vasitələrinin istifadə oluna biləcəyi ərazilərin müəyyənləşdirilməsi, həmçinin qeydiyyatdan keçmiş nəqliyyat vasitələrinin yalnız müvafiq icazəyə malik operatorlar tərəfindən idarə edilməsi nəzərdə tutulur”, – deyə nazir müavini vurğulayıb.