Qızılcanın sürətlə artma səbəbi açıqlandı
Həkimlər qızılcanı ağır xəstəlik adlandırırlar. Bu virusa qarşı peyvənd tətbiq edilmədiyi halda ölümlə də nəticələnir.
Hazırda qızılcaya yoluxma xüsusən də uşaqlar arasında geniş yayılıb. Mütəxəssislər yoluxmanın artmasının səbəbini peyvənddən yayınma ilə əlaqələndirirlər.
Həkim Adil Qeybulla bildirib ki, son illər valideynlər bu məsələyə məsuliyyətsiz yanaşıblar:
“Peyvəndlənmədən yayınıblar, imtina ərizəsi yazıblar. Uşaqları peyvənd etdirməyiblər. Vaksinasiya icbari olmalıdır. Bu halda biz infeksiyanın qarşısını ala bilərik”.
İnfeksionist Vasif Əliyev də uşaqlıq dövründə penvənd olunmanın vacibliyini qeyd edib:
“Uşaqlara 1 və 6 yaşında olmaqla 2 doza vurulmalıdır. Epidemioloji vəziyyəti nəzərə alaraq peyvənddən yayınan böyüklər də vaksin oluna bilərlər. Qızılcaya yoluxan şəxslər ağırlaşma ehtimalı olduğuna görə xəstəxana şəraitində müalicə almalıdırlar”.
Qızılcadan qorunma üsullarına gəlincə, həkimlər deyirlər ki, gigiyena qaydalarına əməl olunmalı, mümkün olduqca yoluxmuş insanla təmasdan uzaq durmaq lazımdır.