"Bilirəm" deyən əslində bilmir" | Mənfəət dolu bu dünyada həqiqi xeyri necə tapaq? - AMİN

“Amin” verilişinin yeni buraxılışında yazıçı, şair İlqar Fəhmi ilə xeyir və şər anlayışları, həqiqətin mahiyyəti, insanın seçimləri və mənəvi dəyərlər ətrafında müzakirə aparılıb.

Verilişdə qeyd olunub ki, müasir dövrdə “xeyir” anlayışı çox vaxt mənfəətlə qarışdırılır. İlqar Fəhmi bildirib ki, insanlar əksər hallarda öz maraqlarına uyğun olanı xeyir, zidd olanı isə şər kimi qiymətləndirirlər: “Xeyir dediyimiz şey çox vaxt mənəvi yox, şəxsi mənfəət kimi qəbul olunur”.

Müzakirə zamanı xeyir və şərin nisbi olub-olmaması məsələsinə də toxunulub. Qeyd edilib ki, fərdlərin maraqları dəyişdikcə xeyir və şər barədə təsəvvürlər də dəyişir. Bununla yanaşı, dini baxışda insanın öz meyarlarından daha üstün olan ilahi həqiqətin mövcudluğu vurğulanıb.

İlqar Fəhmi “xeyir əməldə seçim yoxdur” fikrini önə çəkərək bildirib ki, həqiqi yaxşılıq insanın qarşısına çıxan hər kəsə yönəlməlidir: “Əgər insan xeyrin daşıyıcısıdırsa, yaxşılığı kimə edib-etməyəcəyini seçməməlidir”.

Söhbət zamanı kütlə psixologiyası, fərdi maraqların həqiqətə təsiri və şübhənin düşüncə prosesindəki rolu da müzakirə olunub.

İlqar Fəhminin sözlərinə görə, insanı həqiqətə yaxınlaşdıran məhz öz düşüncələrinə şübhə ilə yanaşmaq bacarığıdır: “Kim ki “bilirəm” deyir, əslində, o bilmir. Kim ki “bilmirəm” deyir, onun həqiqətə çatmaq şansı var”.