Salyanda asfaltlanan yolun qazılmasına rəsmi münasibət

Salyan şəhərinin mərkəzi yollarından sayılan Heydər Əliyev prospektində aparılan qazıntı işləri sakinlərin narazılığına səbəb olub.

Belə ki, hazırda prospektdə kanalizasiya xətləri yenidən qurulur. Bunun üçün isə cəmi 3-4 gün əvvəl çəkilmiş asfalt yol dağıdılıb. Yəni yeni asfaltın sevincini hələ ürəkdolusu yaşamayan sakinlər xoşagəlməz mənzərə ilə üzləşiblər.

Salyan Rayon İcra Hakimiyyəti də məsələdən xəbərdardır. Qurumun Memarlıq və tikinti şöbəsindən verilən məlumata görə, yaranmış problem müvəqqəti xarakter daşıyır.

Salyan şəhərində ilk dəfə müasir və yeraltı kanalizasiya sisteminin qurulması sakinlər tərəfindən də məmnunluqla qarşılanır. Yeganə əhvallarını pozan məqam bu işlərin asfalt örtüyü çəkilməzdən əvvəl görülməməsi ilə bağlıdır.