Sərnişindaşıma şirkətləri Baş nazirə niyə müraciət etdi?

Bakıda müntəzəm sərnişindaşıma fəaliyyəti göstərən daşıyıcı şirkətlər onlara verilən yanacaq subsidiyasının fevralın 1-dən kəsilməsinə etiraz edib.

Məsələ ilə bağlı Baş nazir Əli Əsədova kollektiv müraciət ünvanlayan şirkətlər gediş haqqının 10 qəpik artırılmasından dərhal sonra subsidiyanın kəsilməsinin onların fəaliyyətinə ciddi çətinliklər yaratdığını bildiriblər.

Daşıyıcı şirkətlərin müraciətində bildirilir ki, subsidiyanın kəsilməsi sərnişindaşımada maya dəyərini yenidən yüksəldib və müsbət gözləntiləri minimuma endirib.

Ekspertlərin fikrincə, kəsilən yanacaq subsidiyasının məbləği ilə qiymətlər artırıldıqdan sonra gələn gəliri müqayisə etdikdə qiymətlərin artması şirkətlərin xərclərini kompensasiya etməlidir.

Bununla yanaşı, şirkətlərin xərcləri də artır. Həm park xərcləri, eyni zamanda qiymətlərin artımı fonunda işçilərin əmək haqlarının da artırılması şirkətlərin xərclərini çoxaldır.

Bəs görəsən, bu, sərnişindaşıma qiymətlərinin yenidən artırılmasına gətirib çıxara bilərmi?