“Şikayətimizə baxan yoxdur” | Məmmədli sakinləri acınacaqlı durumda

Abşeron rayonu, Məmmədli qəsəbəsinin sakinləri ərazidəki antisanitar vəziyyətdən şikayətçidirlər.

Belə ki, ərazidə zibil qutuları olmadığından vətəndaşların əksəriyyəti zibilləri gölə atır. Həmçinin ətraf ərazilərdəki çirkab suları gölə axıdılır. Nəticədə ətrafa üfunət qoxu yayılır.

Aidiyyəti qurumlara dəfələrlə müraciət etdiklərini deyən sakinlər şikayətlərinin cavabsız qaldığını bildirirlər:

“Dəfələrlə şikayət etmişik, amma baxan yoxdur. Bələdiyyə əraziyə zibil qabı qoysaydı, camaat bura tullantı atmazdı”.

Məsələ ilə bağlı Abşeron Rayon Məmmədli Bələdiyyəsindən qeyd edilir ki, mövcud problemlərlə bağlı aidiyyəti qurumlara məlumat verilib, amma tədbir görən olmayıb:

“Vətəndaşlar zibil pulunu ödəmir, bunun əvəzinə zibilləri açıq əraziyə və gölə atırlar”.

Üfunətə səbəb olan çirkab sularına gəlincə, bələdiyyədən bildirilir ki, sakinlər kanalizasiya borularını özləri gölə çəkiblər.

Problemlə bağlı Azərbaycan Dövlət Su Ehtiyatları Agentliyindən isə bildirilir ki, Məmmədli qəsəbəsində mərkəzləşdirilmiş tullantı su şəbəkələri yoxdur. Amma təchizat sisteminin olmadığı ərazilərdə şəbəkənin yaradılması üçün layihə sənədləri hazırlanıb və inşa prosesi mərhələlərlə aparılır.