Sirac sağalmayan ürək dağımdır… | Mərhum jurnalistin yaxınları onu belə yad etdi

Bu gün – 29 avqust 4 iyun 2021-ci ildə Kəlbəcər rayonu, Susuzluq kəndində mina partlayışı nəticəsində şəhid olan jurnalist Sirac Abışovun doğum günüdür.

Doğmaları, yaxınları Sumqayıt Şəhidlər xiyabanında şəhid jurnalistin məzarını ziyarət edib, xatirəsini yad ediblər.

“Siracsız onun ad gününü qeyd etmək bizə çox çətindir. Sirac aramızda olmasa da, həmişə qəlbimizdə yaşayır. Əzizləri, doğmaları heç vaxt onu unutmur. O, həmişə qəlbimizdə yaşayacaq. Sirac mənim sağalmayan ürək dağımdır”, – mərhum jurnalistin anası deyib.

Qeyd edək ki, Sirac Abışov 2020-ci ilin noyabr ayından etibarən işğaldan azad olunmuş rayonlarda yaradılmış xüsusi çəkiliş qrupunda operator kimi çalışıb. Ağdam, Füzuli, Cəbrayıl, Zəngilan, Qubadlı, Hadrut, Xocalı və Xocavənd rayonlarının bütün ərazilərində dövlət əhəmiyyətli çəkilişlər edib.

2021-ci ilin iyunun 4-də Kəlbəcərin Susuzluq kəndinə növbəti çəkiliş üçün yola düşüb. Amma kəndə daxil olarkən heyəti aparan “KamAZ” markalı nəqliyyat vasitəsi tank əleyhinə minaya düşüb. Sirac Abışov da daxil olmaqla 3 nəfər hadisə nəticəsində həlak olub.

Şəhid jurnalist Sirac Abışov Sumqayıt Şəhidlər xiyabanında dəfn olunub. Prezident İlham Əliyevin müvafiq Sərəncamı ilə 3-cü dərəcəli “Vətənə xidmətə görə” ordeni ilə təltif edilib.