Jurnalistlərin Kəlbəcərdə minaya düşərək şəhid olmalarından 3 il ötür

İyunun 4-ü AZƏRTAC-ın müxbiri Məhərrəm İbrahimov və Azərbaycan Televiziyasının operatoru Sirac Abışovun şəhid olmalarından üç il ötür.

Xidməti vəzifələrinin icrası ilə əlaqədar işğaldan azad edilmiş Kəlbəcərə ezam olunmuş bir qrup jurnalisti aparan “KamAZ” markalı sərnişin avtomobili 2021-ci ilin iyunun 4-də rayonun Susuzluq kəndində tank əleyhinə minaya düşüb. Nəticədə çəkiliş qrupunun iki üzvü – Sirac Abışov və Məhərəm İbrahimov, habelə Kəlbəcər Rayon İcra Hakimiyyətinin nümayəndəsi Arif Əliyev şəhid olublar, daha dörd nəfər isə yaralanıb.

Məhərrəm İbrahimov Müşfiqabad qəsəbəsindəki qəbiristanlıqda, valideynlərinin yanında dəfn edilib. Ailəli idi, iki övladı var.

Qeyd edək ki, Məhərrəm İbrahimov jurnalist fəaliyyəti boyunca daim hərbi reportyor kimi Azərbaycan Silahlı Qüvvələrinin həm cəbhə bölgəsindəki, həm də digər ərazilərindən reportajlar hazırlayaraq informasiya müharibəsində ön sıralarda olub. Ölümündən sonra o, Prezident İlham Əliyevin sərəncamı ilə 3-cü dərəcəli “Vətənə xidmətə görə” ordeni ilə təltif edilib.

2019-cu ildən AzTV-də işləməyə başlayan Sirac Abışov isə Sumqayıt şəhər Şəhidlər xiyabanında dəfn olunub. Ondan geriyə 2 övladı qalıb. Sirac Abışov ölümündən sonra Prezident İlham Əliyevin imzaladığı sərəncamla 3-cü dərəcəli “Vətənə xidmətə görə” ordeni ilə təltif edilib.