Ailəsi şəhid jurnalist Məhərrəm İbrahimovun ölüm anını danışdı | RETRO BAKU

“Retro Baku” verilişinin yeni buraxılışı yayımlanıb.

Proqramın budəfəki buraxılışı şəhid jurnalist Məhərrəm İbrahimova həsr olunub.

Mərhum jurnalistin həyat yoldaşı Bahar İbrahimova Məhərrəm İbrahimovun şəhid olma xəbərini necə almasından danışıb:

“Sentyabrın 29-da işdən evə gələndə məndən əşyalarını yığmağımı istədi. Müharibəyə gedəcəyini biləndə çox pis oldum.

Cəbhədə olanda çəkilişdən sonra bizə zəng etdi, səsindən təlaşlı olduğu hiss olunurdu. Səhər mesaj yazdı, necə olduğumuzu soruşdu, oğlumuz Uğurla maraqlandı. Ona mesaj yazsam da, cavab vermədi.

Oğlum birinci sinfi bitirdiyi üçün həyəcanlı idim, hazırlaşıb çəkilişə getdik. Orada mənə çoxlu zənglər gəldi, heç birini açmadım. Təkcə Məhərrəmin zəngini gözləyirdim, gözüm telefonda qalmışdı. Sonra yaxınımız zəng etdi, Məhərrəmin minaya düşdüyünü gizlədirdi. Lakin artıq nəsə olduğunu hiss etmişdim.

Özümü necə evə çatdırdım bilmirəm. Bircə deyirdim ki, evdə heç kim olmasın. Çünki əgər insanlar toplaşıbsa, biləcəyəm ki, Məhərrəmə nəsə olub. Evə çatanda gördüm ki, yoldaşımın bacısı, qardaşı həyətdədirlər”.

Şəhidin dostu, jurnalist Fərdin İsazadə Məhərrəm İbrahimovla əlaqələrindən bəhs edib:

“Bir qrup jurnalist o vaxt cəbhə bölgəsinə göndərildi. Məhərrəmlə yaxınlığımız da həmin dövrdə başladı. Biz onunla hərbi jurnalistika yolunu praktika ilə, səhvlərimizdən nəticələr çıxararaq öyrəndik.

Onun minaya düşmə xəbəri yayılanda hələ dəqiq deyildi. Sonra mənə zəng edərək minaya düşənlərdən birinin Məhərrəm olduğunu dedilər. Əsəbi halda “Sizin başınız xarabdır?! Məhərrəm minaya düşə bilməz!” cavabını verdim. Çünki onun atacağı addımlara əmin idim.

O bu sahədə yetişmiş jurnalist idi, ayağını hara qoyacağını bilirdi. Daha sonra təfərrüatlar açıldı, videogörüntülər yayıldı. Məlum oldu ki, avtomobil minaya düşüb. O an qolumuz-qanadımız sındı”.